U 20 di Marzu di u 2009
Ma chÌ ghjÈ a Casa di u Populu Corsu ?
A Casa di u Populu Corsu hè stu locu impastatu da u spìritu cuuperativu chì i nosci maiori avianu innalzatu in u 1978 in Parigi. Oghje hè cumpostu pè a so maiò parte di studienti corsi campendu in Parigi ! A scelta di stu gruppu hè di prumove a lingua è a cultura corsa fora di Corsica trà mezu l’attività di animazione è publicazione. A so andatura s’inghjenna in l’unione è riposa annantu à a sulidarità d’ugnunu chì esse corsu hè un sìntimu cullettivu arradicatu in una mimoria cumuna.
Dipoi a so creazione in u 1978, A CASA DI U POPULU CORSU hè divintata un locu di primura, un fanali pè i Corsi in Pariggi. Dopu à parechji anni d’innattività, cunnosce oghje una vera rinascita cù associ culturali (CULTURA VIVA) mà dinù spurtiva (UNIONE CORSA). U scopu di A CASA ferma u listessu : participà à a diffesa è à a divizia di a cultura corsa prupunendu un lucale di scontru, d’infurmazione è d’animazione in Parigi, senza logica cummerciale o pulìtica. Hè dunque un spaziu di scontru è di fratellanza animatu da i sfarenti attività di l’associ adduniti pà parlà è cantà a noscia lingua. I so cunfarenzi è dibattiti cum’è a so bibliuteca porghjenu a pussibilità d’arricchìsce si di a noscia storia è di a noscia cultura.
A casa hà bisognu di l’impegnu d’ognunu pà u spannu di tutti, postu chì s’è nimu hè indispinsevuli, puri puri, tuttu ugnunu veni nicissariu. Issa casa, issa opera serà ciò no a feremu postu chì o semu insemu o ùn saremu. Una casa, un locu per pruvà à campà corsu puru à più di mila chilometri d’indè noi, à e porte di issa cità tamanta di u cumandu e di a forza. Per ch’ella ùn si spinghja a cuscenza corsa. Ch’ellu ùn morghi u spiritu di u cumunu, di a fratellanza, di l’unità di u nostru populu.
Ci ritruvemu dunque ogni tanti in a Casa d’Issy les Moulineaux, ghjovanni è vechji, omi è donne, studienti è travagliadori… pè ricurdassi chì u nostru Paese si chjama Corsica, è chì ùn si deve micca more. Ùn valenu e chjachjare è v’invitemu in stu locu, in a Casa di u Populu Corsu s’è vo ci vulete incuntrà.
« PARLEMU CORSU, CANTEMU CORSU… MA SOPRATUTTU CAMPEMU CORSU PURU IN PARIGI»
A Casa di u Populu Corsu
