A Festa di a Nazione Corsa
I studienti di a Casa anu urganisatu una ceremonia in Issy-les-Moulineaux pè festighjà l’Immaculata Cuncezzione è a festa di a Nazione.
Sò più di 300 Corsi chì si sò reuniti a dumenica di u sette di dicembre in a chjesa Saint-Benoit, pè sente una messa nustrale detta in corsu da u Vescu di Corsica, Mgre Brunin, è u diacunu Pierre-Jean Franceschi. Sta messa fù dinù cantata in lingua nostra è servita da unepochi di seminaristi corsi di u seminariu d’Issy.
Un certu ministru di a funzione publica e merru d’Issy, M. André Santini, ci hà fattu u piacè di participà à sta festa è di testimunià ci u so sustegnu.
Tutti sti Corsi si so ritrovi dopu à a messa in u lucale storicu di a Casa, pè una veghja fatta di cantu è di gioa, ùn ci mancava piu chè u focu pè credeci in paese !
In sta dumenica si pudia sente ghjovanni è vechji parlà inseme in corsu cum’è in i tempi. Si sò tutti ritrovi ! Ghjovanni cuntenti di vede chì i so vechji eranu sempre quì, pronte à movesi, è vechji cuntenti di vede chì i so ghjuvanotti avianu ripigliati a fiaccula !
Corsi sò indi lochi è portanu cun elli a so cultura e a so lingua !